<?xml version="1.0" encoding="UTF-8"?><song><author>Кӱпей Торбогошева</author>
<lyrics>[V1]
 Ак ла карды јаадырган
 Ак айаска баш болзын!
 Амыр јӱр деп алкаган
 Ада Кудайга баш болзын!

[V2]
 Јашкан карды јаадырган
 Јайааныска баш болзын!
 Јакшы јӱр деп алкаган
 Јайаан Кудайга баш болзын!

[V3]
 Куба чӧлдиҥ тӱбинден
 Кулун јетпезе кем једер?
 Куйулып јӱрген јӱрӱмди
 Кудай билбезе кем билер?

[V4]
 Сары чӧлдиҥ тӱбинден
 Салкын јетпезе кем једер?
 Салып јӱрген јӱрӱмим
 Салым билбезе кем билер?

[V5]
 Ӧзӧккӧ јааган јаш карды
 Ӧксӧп чыккан кӱн билер.
 Ӧрӧ јашту балдарды
 Ӧрӧги турган Кӧк билер.

[V6]
 Јалаҥга јааган јаш карды
 Јалтырап чыккан кӱн билер.
 Јаш балдардыҥ јӱрӱмин
 Јайаган Кудай ол билер.

[V7]
 Кайран кӱӱгис эдерде,
 Карагай агаш јайканат.
 Кайракан Кудай алкаарда,
 Кал јӱрегим токынайт.

[V8]
 Эдил кӱӱги эдерде,
 Эмил агаш јайканат.
 Эдим-салым алкаарда,
 Эт-јӱрегим токынайт.

[V9]
 Кумак сайдыҥ ӱстине
 Куйругын јайган эрјене.
 Кутус куйун јӱрӱмим
 Кудай салган Кайракан.

[V10]
 Сай кумактыҥ ӱстине
 Сакагын салган эрјене.
 Салып јӱрген јӱрӱмим
 Салым берген Кайракан.

[V11]
 Кара талай тӱбинде
 Кармактап јетпес балык бар.
 Кайракан Кудай алдында
 Кайкап јетпес јӱрӱм бар.

[V12]
 Теҥис талай тӱбинде
 Тегектеп јетпес балык бар.
 Теҥериниҥ алдында
 Теҥдеп јетпес јӱрӱм бар.

[V13]
 Суулаган темир јок болзо,
 Сулук кайдаҥ келетен?
 Салым-Кудай јок болзо,
 Јыргал кайдаҥ келетен?

[V14]
 Кайылткан темир јок болзо,
 Кайчы кайдаҥ келетен?
 Кайракан Кудай јок болзо,
 Јыргал кайдаҥ келетен?

[V15]
 Алтын јӱстӱк колыста,
 Арба јажыс Кудайда.
 Мӧҥӱн јӱстӱк колыста,
 Мӧҥкӱ јажыс Кудайда.</lyrics>
<title>АЛТАЙ ЈАҤАР КОЖОҤДОР СТЈК136</title>
<hymn_number>136</hymn_number>
</song>